Nefroptoz (böyrək sallanması)

Müəllif: elnare
Tarix: 8 yanvar 2017
Baxış sayı: 4 918
0 rəy

Nefroptoz böyrəklərin sallanması, onun patoloji hərəkətli olmasına deyilir. Bu hal sağ tərəfdə daha çox təsadüf olunur. Patolojiyası həm birtərəfli , həm ikitərəfli ola bilər. Xəstəlik ən çox qadınlarda rast gəlinir.
ETİOLOGİYASI:

Böyrəyin bağ aparatının zəifliyi və travma nəticəsində, güclü arıqlama , qarının ön divarının tonusunun azalması nəticəsində baş verir.

PATOGENEZ:

Qadınlarda paravertebral çuxurun dayazlı olduğu üçün onlarda nefroptoz daha çox təsadüf edilir. Böyrəkətrafı piy toxumasının azalması böyrəyin sallammasına, onun damarlarının əyilməsinə və dartılmasına , hemodinamikasının pozulmasına səbəb olur. Sidik axarının əyilməsi isə urodinamik pozğunluqlara gətirib çıxarır.
KLİNİKASI:

Nefroptoz uzun illərlə gizli gedişə malik ola bilir. Nefroptozun 3 növü var:
1 – nəfəs aldıqda ,ayaq üstə böyrəyin aşağı qütbü əllənir. Xəstədə heç bir şikayət olmur.
2 -vertikal vəziyyətdə böyrək aşağı düşür və tam əllənir, horizontal vəziyyətdə böyrək öz yerinə qayıdır.
3 -böyrək təbii yerindən aşağı düşür , qarın boşluğunun başqa nahıyyələrində, böyük və kiçik çanaqda ola bilir.
Bu zaman böyrək damarlarının dartılması nəticəsində böyrək qan dövranı pozulur, urodinamik dəyişikliklər baş verir. Xəstələr bel nahiyəsində zəif ağrılardan , başgicəllənmədən , ürəkdöyünmədən, meteorizm və qusmadan şikayət edirlər.Böyrək nahiyəsində ağrılar adətən ağır fiziki işdən sonra özünü büruzə edir , axşama yaxın artır, hətta sancı şəkli alır.
MÜAYİNƏSİ:

Laborator müayinə zamanı sidikdə hemoturiya aşkar edilir. Rentgenoloji müayinələr həm ayaq üstə, həm də xəstənin uzanmış vəziyyətində çəkilir.
AĞIRLAŞMALARI:

Pielonefrit, arterial təzyiq, qanaxma, böyrəkdaşı xəstəliyi.
MÜALİCƏSİ:

Müalicəsi xəstəliyin mərhələlərindən və ağırlaşmalarından asılıdır. Adətən konservativ müalicə məqsədəuyğun sayılır. Xəstəyə 3 kq -dan artıq yük qaldırmamaq, müalicə bədən tərbiyəsi, bir qədər kökəlmək məsləhət görülür.

Bu portalda yerləşdirilmiş bütün məqalələr peşəkar həkim tərəfindən yazılıb. Saytımızdan hər hansı məlumat götürdükdə hipper-link ilə istina vacibdir https://immunitet.az/.